Recentemente profesorado dos departamentos de Administración e Comercio e de Informática do IES Chan do Monte fixeron unha visita conxunta de tipo jobshadowing (ou observación de profesionais) a distintas empresas en Bélxica.
A visita principal desenvolveuse na cidade de Hasselt, nas instalacións de Jaga Belgium, unha empresa líder no sector da climatización e ventilación. Durante dous días asistimos, xunto con outros profesionais do sector procedentes de diferentes partes de España, a unha formación por parte da empresa que incluíu unha revisión dos seus últimos produtos, algúns aínda non lanzados ao mercado, unha visita á fábrica, e outras actividades como un agradable paseo en bicicleta polos arredores da empresa e da vila de Hasselt.
Ademáis desta formación tamén tivemos ocasión de iniciar contactos cos departamentos de recursos humáns, tanto de Jaga como doutra compañía de climatización, ACV, nos arredores de Bruselas, na procura de novos destinos de prácticas para o alumnado de formación profesional de IES Chan do Monte.
E por último, tamén tivemos tempo de facer algunhas visitas culturais, como por exemplo Bruxas e Gante, cuxos centros históricos están declarados como Patrimonio da Humanidade.
Leave a Reply